ਪਰਦੇਸ ਵੱਸਣ ਵਾਲਿਆ ਸ਼ਿਵ ਕੁਮਾਰ ਬਟਾਲਵੀ
ਪਰਦੇਸ ਵੱਸਣ ਵਾਲਿਆ
ਰੋਜ਼ ਜਦ ਆਥਣ ਦਾ ਤਾਰਾ
ਅੰਬਰਾਂ 'ਤੇ ਚੜ੍ਹੇਗਾ
ਕੋਈ ਯਾਦ ਤੈਨੂੰ ਕਰੇਗਾ
ਪਰਦੇਸ ਵੱਸਣ ਵਾਲਿਆ ।
ਯਾਦ ਕਰਕੇ ਤੈਂਡੜੇ
ਠੁਕਰਈ ਹਾਸੇ ਦੀ ਆਵਾਜ਼
ਜਿਗਰ ਮੇਰਾ ਹਿਜਰ ਦੇ
ਸੱਕਾਂ ਦੀ ਅੱਗ ਵਿਚ ਸੜੇਗਾ
ਪਰਦੇਸ ਵੱਸਣ ਵਾਲਿਆ ।
ਤੇਰੇ ਤੇ ਮੇਰੇ ਵਾਕਣਾਂ
ਹੀ ਫੂਕ ਦਿੱਤਾ ਜਾਏਗਾ
ਜੋ ਯਾਰ ਸਾਡੀ ਮੌਤ 'ਤੇ
ਆ ਮਰਸੀਆ ਵੀ ਪੜ੍ਹੇਗਾ
ਪਰਦੇਸ ਵੱਸਣ ਵਾਲਿਆ ।
ਗਰਮ ਸਾਹਵਾਂ ਦੇ ਸਮੁੰਦਰ
ਵਿਚ ਗਰਕ ਜਾਏ ਦਿਲ
ਕੌਣ ਇਹਨੂੰ ਨੂਹ ਦੀ
ਕਿਸ਼ਤੀ ਦੇ ਤੀਕਣ ਖੜੇਗਾ ?
ਪਰਦੇਸ ਵੱਸਣ ਵਾਲਿਆ ।
ਧਰਤ ਦੇ ਮੱਥੇ 'ਤੇ
ਟੰਗੀ ਅਰਸ਼ ਦੀ ਕੁੰਨੀ ਸਿਆਹ
ਪਰ ਕਲਹਿਣਾ ਨੈਣ
ਸਮਿਆਂ ਦਾ ਅਸਰ ਕੁਝ ਕਰੇਗਾ
ਪਰਦੇਸ ਵੱਸਣ ਵਾਲਿਆ ।
ਪਾਲਦੇ ਬੇ-ਸ਼ੱਕ ਭਾਵੇਂ
ਕਾਗ ਨੇ ਕੋਇਲਾਂ ਦੇ ਬੋਟ
ਪਰ ਨਾ ਤੇਰੇ ਬਾਝ
ਮੇਰੀ ਜ਼ਿੰਦਗੀ ਦਾ ਸਰੇਗਾ
ਪਰਦੇਸ ਵੱਸਣ ਵਾਲਿਆ ।
ਲੱਖ ਭਾਵੇਂ ਛੁੰਗ ਕੇ
ਚੱਲਾਂ ਮੈਂ ਲਹਿੰਗਾ ਸਬਰ ਦਾ
ਯਾਦ ਤੇਰੀ ਦੇ ਕਰੀਰਾਂ
ਨਾਲ ਜਾ ਹੀ ਅੜੇਗਾ
ਪਰਦੇਸ ਵੱਸਣ ਵਾਲਿਆ ।
ਬਖ਼ਸ਼ ਦਿੱਤੀ ਜਾਏਗੀ
ਤੇਰੇ ਜਿਸਮ ਦੀ ਸਲਤਨਤ
ਚਾਂਦੀ ਦੇ ਬੁਣ ਕੇ ਜਾਲ
ਤੇਰਾ ਦਿਲ ਹੁਮਾ ਜੋ ਫੜੇਗਾ
ਪਰਦੇਸ ਵੱਸਣ ਵਾਲਿਆ ।
ਰੋਜ਼ ਜਦ ਆਥਣ ਦਾ ਤਾਰਾ
ਅੰਬਰਾਂ 'ਤੇ ਚੜ੍ਹੇਗਾ
ਕੋਈ ਯਾਦ ਤੈਨੂੰ ਕਰੇਗਾ
ਪਰਦੇਸ ਵੱਸਣ ਵਾਲਿਆ ।
